Velferdsteknologi

Bur du aleine og treng å tilkalle hjelp i akutte situasjonar, kan du søkje om tryggleiksalarm. Alarmen har du på deg heile døgnet, og med den kan du enkelt tilkalle hjelp i akutte situasjonar. Når du trykker på alarmen, vil Alarmsentralen eller helsepersonell umiddelbart ta kontakt med deg, vurdere nødvendig oppfølging og ved behov sende hjelp til deg. Vi tilbyr både stasjonær og mobil tryggleiksalarm. 

Tryggleiksalarm er ikkje ei lovpålagd teneste, det er derfor eigendel for denne tenesta. 

Meir informasjon om tryggleiksalarm og eigendel

Vi tilbyr ulike sensorar som kan gi auka tryggleik i eigen heim. 

Velferdsteknologi som består av sensorar som varslar automatisk ved uønska hending reknast som digitale tilsyn. Dette er teknologiske løysingar som er tildelt etter helse- og omsorgstenestelova. Digitale tilsyn gjer at helsepersonell eller pårørande får melding dersom ein alarm automatisk vert utløyst. 

Målet med teknologien er å unngå fare, redusere skade og automatisk tilkalle hjelp for deg viss du ikkje er i stand til det sjølv, samstundes som det gir deg auka fridom. 

Eksempel på teknologi:

• Sengesensor
• Dørsensor
• Bevegelsessensor
• Fallsensor
   

Digitale tilsyn kan nyttast både for heimebuande og for bebuarar på institusjon. Det er brukaren sitt behov som avgjer kva teknologi vi skal nytte, og det vert alltid gjort ei individuell vurdering kva som er teneleg.  

Nytt tilbod  ved Fjaler sjukeheim - Varda Care sengematte
Varda Care sengematte er ei tynn matte som ligg under madrassen i senga di. Den registrerer når du ligg i senga og når du står opp.
Matta kan også kartlegge søvn og uro i løpet av natta, og den kan måle hjarte- og respirasjonsfrekvens.

Kvifor bruke Varda Care sengematte?

• Den kan vere eit hjelpemiddel for å oppdage endringar i søvnmønster og indikere endringar i helsetilstand
• Den kan forhindre fall
• Du kan sove rolegare og sleppe å verte forstyrra på natt når det ikkje er behov for det
• Nattevakta får varsel viss du treng hjelp
• Nattevakta får god oversikt over brukarane på si avdeling, og den vil vere eit hjelpemiddel for prioritering basert på behov og frigjere tid til omsorg
• Varda Care sengematte er eit supplement til ordinær nattevakt for å auke kvalitet og pasienttryggleik
   

For å ta i bruk Varda Care sengematte eller anna digitalt tilsyn må du eller pårørande samtykke til tenesta.

Meir informasjon om Varda Care sengematte 

Elektronisk medisineringsstøtte kan vere ein måte å få hjelp med å ta medisinane dine på. Ein elektronisk medisindispenser gir deg eit varsel når du skal ta medisinen, og vil derfor vere til hjelp for å sikre at du tek rett medisin til rett tid. Løysinga har også moglegheit til å varsle pårørande eller helsepersonell viss medisin ikkje vert tatt ut av dispenseren.

For å nytte medisindispenser må du ha medisin tillaga i multidoserull frå apoteket. Du får låne multidosedispenser gratis i den perioden du treng det, medikamenta må du betale for sjølv.

Ynskjer du å fortsette å gå turar, men er redd for å ikkje finne vegen tilbake?

Lokaliseringsteknologi/GPS er ei teneste for personar med orienteringsvanskar. Ved bruk av GPS kan helsepersonell eller pårørande få varsel og finne posisjon din viss det er behov for det. 

Målet med tenesta er at personar med orienteringsvanskar, og pårørande, skal oppleve tryggleik, fridom, meistring og at ein er sjølvstendig. Lokaliseringsteknologi kan bidra til å oppretthalde ein aktiv kvardag.

Det kjem stadig ny teknologi på marknaden som mange går til innkjøp av. Dette er teknologi som kan gjere kvardagen lettare, og som kan bidra til at ein kan klare daglege aktivitetar og gjeremål på eiga hand.  Slik kan ein få ein lettare, tryggare og meir sjølvstendig kvardag.

Her er eksempel på teknologi du kan kjøpe sjølv: 

• Robotstøvsugar
• Robotplenklippar
• Ledelys som slår seg automatisk på viss du må opp om natta
• Komfyrvakt
• Tidsbrytar på kaffetraktar og andre hushaldningsapparat
• KOMP viss ein ynskjer å halde kontakt med familie og vener, og det er vanskeleg å bruke smarttelefon eller nettbrett

Dersom du har nedsett funksjonsevne på grunn av skade eller sjukdom, kan du få låne hjelpemiddel for ein kortare eller lengre periode. Eit hjelpemiddel kan bidra til å redusere praktiske problem for personar med nedsett funksjonsevne. Hjelpemiddel kan gje betre funksjon, eller det kan kompensere for tapt funksjon. 

Det fins mange ulike typar hjelpemiddel, som til dømes rullestol, toalettforhøgar, lupelamper og ulike typar velferdsteknologiske løysingar.

Lån av hjelpemiddel