Ein reguleringsplan skal vere i tråd med kommuneplanen sin arealdel.
Privatpersonar, tiltakshavar, organisasjonar og andre myndigheiter kan legge fram eit forslag til reguleringsplan. Forslaget skal utarbeidast av fagkyndige/plankonsulent, jf. plan- og bygningslova § 12-3.
Dersom du ynskjer å fremme ein plan som ikkje samsvare med kommuneplanen sin arealdel, kan du fremma eit planinitativ som kommunen må vurdere. Vanlegvis vil ein reguleringsplan i strid med kommuneplanen sin arealdel krevje ei konsekvensutgreiing. Dette vil kunne medverke til at sakshandsaminga vil ta lengre tid samanlikna med om planen samsvarar med kommuneplanen sin arealdel.
1. Før planarbeidet startar
- Før planarbeidet kan settast i gang må du ha eit oppstartsmøte med oss i kommunen.
- Du må betale gebyr for oppstartsmøte.
- Du kan bestille oppstartsmøte hjå kommunen si planavdeling.
- Kommunen fører referat frå oppstartsmøtet.
2. Oppstart av planarbeid/planinitiativ
- Utkast til oppstartsdokument (planinitiativ med tilhøyrande dokument) sendast over til planavdelinga for kvalitetssjekk.
- Plankonsulent kunngjer oppstart av planarbeidet i lokale avis, på eiga nettside og eventuelt i sosiale medier. Plankonsulenten skal også sende oppstartsvarselet til Fjaler kommune, som legg det ut på kommunen sine nettsider. SOSI-fil av planavgrensning skal leggast ved.
- Kunngjeringa skal minimum innehalde kartskisse som viser avgrensing av planområdet og ei kort skildring av føremålet.
- Dersom planen krev konsekvensutgreiing, skal planprogram leggast ut på høyring samtidig, dersom planprogram er påkravd. Utkast til planprogram skal sendast til planavdelinga for kvalitetssjekk minst to veker før høyring/varsel om oppstart.
- Frist for å kome med merknader bør vere minst 30 dager. Ved konsekvensutgreiing skal fristen settast til minst seks veker.
- Plankonsulent skal varsle oppstart av planarbeidet med eige brev til berørte offentlege instansar, registrerte grunneigarar, festarar og andre rettigheitshavara, naboar, gjenbuarar og andre interesserte som blir direkte berørt.
- Varslingsbrev skal greie ut for forslaget og konsekvensar for omgivnadane.
- Kart og illustrasjonar skal leggast ved.
3. Utarbeide planforslag
Eit planforslag skal innehalde føresegner, plankart, planskildring med ei eventuell konsekvensutgreiing, samt nødvendige analyser, utgreiingar og illustrasjonar.
Planmaterialet skal vere utforma i samsvar med Kommunal-, og moderniseringsdepartementet sine rettleiarar, kart- og planforskrifta.
Dersom planarbeidet krev konsekvensutgreiing, skal kommunestyret vedta planprogrammet etter høyringa. Faktura sendast forslagsstillar når planprogrammet fremmast for vedtak.
Plankonsulent skal utarbeide planforslag etter Nasjonal Produktspesifikasjon for digitale planar og kommunen sine eigne malar.
Alle dokument skal sendast inn i filformat PDF, men plankart skal også sendast i filformat SOSI. Fjaler kommune ynskjer også Word-versjon av alle tekstdokument, mellom anna føresegner.
Krav til dokumentasjon
- Plankart (PDF og SOSI)
- Føresegner
- Planskildring
- Risiko- og sårbarheitsanalyse
- Tilleggsdokumentasjon - ved behov (til dømes støyvurdering, naturmangfald, osv.)
- Merknader og uttalar - send inn innkomne merknader og uttalar saman med forslagstillar sine kommentarar. Alle merknader og uttalar skal leggast ved i si heilheit.
- Varslingar - kopi av kunngjeringsannonse (datert), samt varslingsbrev og liste over kven som er varsla.
- Konsekvensutgreiing (KU) skal vere innarbeida i planskildringa, dersom planarbeidet krev konsekvensutgreiing.
Planforslag sendast til post@fjaler.kommune.no
4. Offentleg ettersyn og høyring
Komplett planforslag blir lagt fram for formannskapet som avgjer om forslaget skal leggast ut til offentleg ettersyn.
Når kommunen har motteke eit komplett forslag, er saksbehandlingsfrist tolv veker. Kommunen går gjennom saka og plankonsulent vert informer om vidare framdrift. Dersom planforslaget ikkje er komplett vil planavdelinga gi tilbakemelding om kva endringar som må gjerast. Forslagstiller kan avtale undervegsmøte mot gebyr.
Dersom planavdelinga må omarbeide planforslaget vil det bli kravd gebyr etter medgått tid.
- Faktura sendast til forslagstillar før plansaka blir tatt opp til politisk handsaming for første gang.
- Kommunen kunngjer vedtak om offentleg ettersyn og høyring i lokalavis, på kommunen si nettside og eventuelt i sosiale media.
- Berørte partar og myndigheiter vil bli varsla.
Merknader og uttalar kan sendast til post@fjaler.kommune.no eller til Fjaler kommune, Dalstunet 20, 6963 Dale i Sunnfjord, innan seks veker.
5. Planvedtak
- Etter at høyringsfristen er gått ut, sender kommunen innkomne merknader og uttalar til plankonsulent for vurdering og kommentar.
- Plankonsulent innarbeidar merknader og uttalar med kommentarar i planforslaget og sender revidert planforslag til kommunen.
- Planforslaget blir lagt fram for formannskapet for handsaming.
- Kommunestyret fattar endeleg planvedtak.
- Kommunen kunngjer vedtaket i lokalavis, på kommune si nettside og eventuelt i sosiale media.
- Kommunen informerar plankonsulent, forslagstiller og berørte partar om vedtaket.
6. Klage
Du har moglegheit til å klage på vedtaket. Klagefristen er tre veker frå kunngjeringsdato.
Her finn du informasjon om korleis du klagar på eit vedtak.